Со показни вежби на Единицата за брзо распоредување, на Одделот за заштита на определени личности и објекти на дружба со граѓаните и Специјалната антитерористичка единица „Тигар“, прелет над градот на хеликоптер од воздухопловната единица на МВР и можност за дечињата да влезат во полициски хеликоптер, како и дружење со полициските службеници и опрема од сите единици во Крива Паланка денес беше одбележан претстојниот Ден на полицијата, 7 Мај.
На настанот присуствуваа Директорот на бирото за јавна безбедност, Сашо Тасевски, со претставници на кабинетот и градоначалникот на Крива Паланка, Сашко Митовски, како и претставници од СВР Куманово и ОВР Крива Паланка.
На градскиот стадион во Крива Паланка беа изложени и опрема, униформи и возила на бројни служби и единици до МВР со цел граѓаните да се запознаат со полициската професија и нивната опрема.
Настанот се реализираше во соработка со Општина Крива Паланка, а присуствуваа неколку стотици посетители од градот и околните места.
Од општината посочија дека нема подобар начин за запознавање на граѓаните со полицијата од взаемната соработка меѓу локалната заедница и полициските службеници, а токму тоа партнерство се промовира со ваквите настани.
Градоначалникот Митовски ја поздрави иницијативата да им се пружи можност граѓаните и сите жители на општината и регионот да можат да ги проследат показните вежби од страна на Единиците на МВР, да се запознаат со опремата и да се дружат со чуварите на мирот.
Посочи дека полициските службеници се партнери на граѓаните во зачувување и одржување на спокојното живеење, на јавниот ред и мир, на безбедноста и сигурноста и во име на жителите на општина Крива Паланка, упати благодарност за нивната несебична посветеност на службата.
Освен во Крива Паланка, настани од ваков вид денес се одржаа и во Струмица, Велес, Струга и Крушево.
