Општина Крива Паланка се простира на површина од 481 км², лоцирана во Североисточниот плански регион на Република Северна Македонија. Територијата на општината е разновидна по релјеф, со надморска височина што се движи од 450 м.н.в. до 2252 м.н.в., колку што изнесува височината на врвот Руен на Осоговските Планини еден од најистакнатите и највисоки врвови на овој планински масив.
Општината географски се наоѓа во сливното подрачје на Крива Река, а просторно се распростира на:
- северните падини на планината Осогово,
- јужните падини на планината Герман,
- дел од рамничарскиот предел Биљино Поле.
Благодарение на ваквата поставеност, територијата има комбинација од планински и ридско-долински предели, богата хидрографска мрежа и релативно умерено-континентална клима со изразени планински влијанија.