На 10 мај годинава учениците од музичката паралелка од ООУ „Јоаким Крчовски“ – Крива Паланка под менторство на професорката Лариса Жулина-Митовски учествуваа на вториот Меѓународен натпревар „Сергеј Михајлов 2021″ во Штип.
Фестивалот на млади талентирани музичари е со натпреварувачки карактер и е организиран од страна на ДМУЦ „Сергеј Михајлов“, со поддршка на Министерство за култура.
Фестивалот беше реализиран со физичко присуство на повеќе локации во градот, а истовремено беше вклучена и опцијата за онлајн натпреварувачи.
Натпреварувањето беше организирано од професионален тим, согласно сите протоколи поради пандемијата, додека комисиите за избор на победниците беа составени од реномирани професори.
И покрај големата конкуренција на млади таленти, учениците од Крива Паланка од класата на професорката Лариса Жулина-Митовски освоија награди во своите категории. Михаил Митовски освои прва награда, додека Теодор Смиљков трета награда.
Освен успешните настапи и наградите, учениците од фестивалот понесоа позитивни впечатоци од фестивалот и меѓусебната дружба за време на натпреварот.
