Градоначалникот на Општина Крива Паланка денес беше во посета на Здравствениот дом во Крива Паланка, каде направи обиколка на новоопремениот оддел за прием на потенцијални пациенти од Ковид-19 (корона вирус).
Согласно насоките на Министерството за здравство, во Здравствениот дом од Крива Паланка, опремен е оддел за прием и негување на заболени од Ковид-19.
За таа намена, комплетно се уредени и опремени медицински простории, како за потенцијални пациенти, така и за медицинскиот и помошниот персонал со вкупна површина од 300 м2 и 15 легла во одделот.
Во оваа прилика директорот на Здравствениот дом, д-р. Бранко Стаменковски изјави:
„ Во овие моменти на глобална здравствена криза сите активно се вклучивме и заеднички правиме напори за подобра пристапност и третман за потенцијалните пациенти, а во насока на задоволување на потребите за подобра превенција и здравје на локалната заедница.“
Здравствениот дом располага со искусни специјализирани медицински лица, кои секогаш се спремни да пружат врвна медицинска услуга на сите пациенти. Исто така ставени се на располагање и допoлнителни, соодветно опремени медицински простории, како и 30 дополнителни легла.
Од страна на општествено одговрни локални бизнисмени, за овој оддел, денес беа донирани и пет апарати за кислородна терапија, т.н. кислородни концентратори на кои истовремено можат да бидат приклучени и по два пациенти.
Градоначалникот Мицевски во заедничка координација со претставници од Црвениот крст, денес го посети и семејството на заболениот наш сограѓанин и воедно врачи хуманитарен пакет со средства за хигиена, основни домашни намирници и храна, за ова семејство.
Во оваа прилика, градоначалникот Мицевски ја изрази спремноста за помош и редовна поддршка од страна на локалната самоупрва и сите граѓани, во насока на што полесно справување со здравствените последици и спречување на ширењето на вирусот Ковид- 19.
Воедно, Општина Крива Паланка упатува апел до сите граѓани да се придржуваат до мерките и препораките од Министерството за здравство и сите надлежни институции.
