Околу шеесетина дечиња од четврто одделение од основното општинско училиште „Илинден“, Крива Паланка денес учествуваа на креативни работилници на кои учеа за важноста на редовното консумирање чиста вода и придобивките од свесноста за значењето на водата во целокупното функционирање на човековиот организам.
Работилниците се насловени „Изворска – извор на креативноста“, а ги спроведува Маркетинг агенцијата „Маркетинг микс“ во соработка со специјален едукатор за обработка на полимерни глини- Марија Манева.
-Важноста на пиење вода и редовно консумирање вода со цел подобра здравствена состојба беше целта на денешните едукативни работилници на кои учениците работеа со поилимерни глини изработувајќи шишенца за вода-магнети, а низ работа и игра учеа за значењето и улогата на водата за нивното здравје. Поради исклучителната важност на темата, овој проект наречен „Извор на креативноста“ се реализира со поддрша на Министерството за образование и наука на Република Македонија и Биро за развој на образованието, а ние како училиште ги оворивме вратите за организаторите нудејќи им можност на дечињата за ново и несекојдневно, позитивно –едукативно искуство, изјави Марица Николовска, директор на ООУ „Илинден“, Крива Паланка.
Според Николовска, покрај дечињата кои директно беа вклучени во активностите, пораката од работилниците посредно ќе биде дисперзирана и до поширокиот круг на ученици, наставници и родители.
Покрај едукативниот карактер, работилниците помагаат за развој на креативностa, моторичките и ликовни вештини на дечињата.
Караванот продолжи во основно општинско училиште „Кочо Рацин“, Куманово, а проектните активности опфаќаат околу 1.000 дечиња на возраст од 7 до 15 години од вкупно 12 училишта од Македонија.
