Со свечена седница на Советот на Општина Крива Паланка денес беше одбележан 8 Октомври – Денот на ослободувањето на градот и 82 години слободна Крива Паланка.
На свеченоста присуствуваа поранешни градоначалници, пратеници во Собранието на Република Северна Македонија, претставници на МПЦ, дипломатскиот кор, делегации од збратимените и пријателски градови на Крива Паланка, советници како и бројни гости.
Посебно значење на годинешната свечена седница ѝ дадоа две нови форми на соработка, насочени кон поврзување на луѓето, јакнење на добрососедските односи и отворање можности за заеднички развој.
Општина Крива Паланка и Општина Тургутлу од Република Турција, на Свечената седница и официјално го потврдија своето збратимување, со потпишување Меморандум за соработка од страна на градоначалникот на Крива Паланка Сашко Митовски и градоначалникот на Тургутлу, Џетин Акин.
Новото партнерство отвора простор за соработка и размена меѓу двете општини во повеќе области – од културата, образованието и спортот, до размена на искуства, контакти меѓу младите и создавање можности за идни заеднички активности и проекти.
Симболиката на збратимувањето е особено силна токму на 8 Октомври – денот кој го означува ослободувањето на Крива Паланка, кога едно историско наследство добива и нова димензија преку создавање трајни врски меѓу луѓето и заедниците.
На свечената седница беше направен и чекор кон уште едно прашање од големо значење за пограничниот простор и неговите жители. Градоначалникот Сашко Митовски и градоначалничката на Општина Трговиште, Наташа Манасиевич, потпишаа Декларација за заедничка поддршка на иницијативата за трајно отворање на граничниот премин “Трговиште–Огут“ меѓу Република Србија и Република Северна Македонија.
Иницијативата е насочена кон олеснување на движењето и поврзувањето на населението од двете страни на границата, но и кон создавање дополнителни можности за економска, туристичка и културна соработка меѓу пограничните средини. Со потпишувањето на Декларацијата, Општина Крива Паланка и Општина Трговиште ја потврдуваат заедничката заложба иницијативата да продолжи пред надлежните институции и да добие конкретна институционална поддршка.
Во рамки на свечената седница беше усвоена и Одлуката за доделување на наградата „8 Октомври“ и признанија за особени постигнувања и придонес за развојот и афирмацијата на Општина Крива Паланка за 2026 година.
Пред присутните се обрати градоначалникот Сашко Митовски, упатувајќи честитка по повод Денот на ослободувањето и истакнувајќи ја одговорноста на сегашната генерација да го чува наследството на слободата, но и преку соработка и конкретни дела да создава подобри услови за живот и развој на градот. Во тој контекст, тој го истакна значењето на новите партнерства со Трговиште и Тургутлу како можности што треба да добијат своја практична вредност преку идните средби, проекти и заеднички активности.
Одбележувањето на 8 Октомври така годинава обедини три важни пораки – сеќавање на оние кои се бореле за слободата, почит кон градот што го наследивме и одговорност за градот што го оставаме зад себе.
Крива Паланка го одбележа својот ден со поглед кон иднината – со ново пријателство со Тургутлу и со заедничка заложба со Трговиште за отворање на нова врска меѓу луѓето од двете страни на границата.
Нека е честит 8 Октомври – Денот на ослободувањето на Крива Паланка!