Градоначалникот на Општина Крива Паланка, Сашко Митовски, денес изврши увид во тековните градежни работи на патниот правец кон туристичкиот локалитет Калин Камен, каде што во тек е реализација на значаен инфраструктурен проект за подобрување на пристапноста до една од најважните туристички дестинации во регионот.
Проектот опфаќа реконструкција на патниот правец во должина од околу 6 километри, со вкупна вредност од 61.116.772,50 денари со вклучен ДДВ, а средствата се обезбедени преку Министерството за транспорт.
Со реконструкцијата ќе се унапреди сообраќајната инфраструктура и безбедноста на движењето кон Калин Камен, создавајќи подобри услови за пристап до локалитетот и за негово понатамошно туристичко позиционирање.
Калин Камен е простор со значаен природен и туристички потенцијал, а подобрата патна поврзаност претставува најважен предуслов за негово поголемо туристичко користење и за развој на понудата на Општина Крива Паланка.
Согласно предвидената динамика на изведба и во зависност од временските услови, завршувањето на реконструкцијата се очекува до крајот на овој месец.
Инвестициите во патната инфраструктура се инвестиции во подобра поврзаност, поголема пристапност и создавање услови природните и туристичките потенцијали на Крива Паланка да бидат уште подостапни и препознатливи за посетителите.