Денес, во организација на Програмата за развој на Обединетите нации, УНДП, се одржа тркалезна маса на тема „Отвореност, транспарентност и отчетност во пристапот до информации од јавен карактер и креирањето институционална култура на активна транспарентност“.
На настанот беа споделени позитивните практики на Општина Крива Паланка, како водечка општина во државата според степенот на отвореност и институција која две години по ред е прогласена за најтранспарентна во Македонија.
Во рамките на дискусијата беше презентиран пристапот на Општина Крива Паланка, како и заложбата на градоначалникот Сашко Митовски за создавање ефикасни механизми и алатки за навремено, точно, јасно и разбирливо информирање на граѓаните.
Како конкретни позитивни практики, кои се препознаени и врз чија основа Општината е високо рангирана, беа издвоени:
● редовното ажурирање на официјалната веб-страница и комуникациските канали на Општината;
навременото, точно и јасно информирање на граѓаните;
● достапноста и разбирливоста на информациите за сите категории граѓани, вклучително и за лицата со попреченост;
● транспарентноста во работата и седниците на Советот на Општина Крива Паланка;
● активното вклучување на граѓаните во процесите на креирање локални политики преку буџетските и граѓанските форуми;
● непосредната комуникација со локалното население;
● учеството на граѓаните во одлучувањето преку различните облици на месна самоуправа.
Овие практики потврдуваат дека отвореноста и транспарентноста не претставуваат само формална обврска, туку институционална култура што се гради преку секојдневна, одговорна и непосредна комуникација со граѓаните.
Општина Крива Паланка продолжува посветено да гради отворена, отчетна и достапна локална самоуправа, во која граѓаните се навремено информирани, активно вклучени и слушнати.
