Во духот на православната вера и духовната традиција, денес во манастирскиот комплекс на Осоговски манастир свечено беше одбележан празникот посветен на Свети Јоаким Крчовски.
На одбележувањето, во присуство на бројни верници, беше отслужена Божествена литургија, исполнета со молитвена радост, духовен мир и заедништво.
Со особена чест и достоинство, на настанот присуствуваше градоначалникот Сашко Митовски, кој оваа година го имаше кумството на празникот, заедно со сопругата Маја и голем број сограѓани и верници.
Во рамки на свеченоста беше извршено и осветување на крстот на куполата на црквата посветена на Свети Јоаким Крчовски, што претставува силен духовен и историски чин. Ова е првата црква во Македонија посветена на македонскиот светител, со што уште еднаш се потврдува значењето на неговото дело и духовното наследство кое го оставил за идните генерации.
Во своето обраќање, градоначалникот истакна:
„Да се биде кум на овој светол и возвишен празник претставува длабока чест и духовна обврска. Со особена благодарност кон Бога и со почит кон делото на Свети Јоаким Крчовски, заедно со моите сограѓани ја чуваме живата нишка на верата, ја негуваме традицијата и го пренесуваме духовното наследство кое нè обединува и нè крепи како народ.“
Тој додаде и дека:
„Со неизмерна чест и радост бев дел од овој свет чин, кој ја зајакнува нашата вера и ја потврдува духовната врска со нашите корени и светители.“
Под сводовите на древниот Осоговски манастир, молитвите и духовната светлина уште еднаш го потврдија значењето на духовното наследство и почитта кон ликот и делото на светителите.
Свети Јоаким Крчовски останува траен симбол на верата, писменоста и духовното воздигнување на народот.
Настанот заврши во достоинствена и молитвена атмосфера, со порака за единство, мир и почит кон традицијата.
Нека е честит и за многу години празникот на Свети Јоаким Крчовски.