Во духот на пријателството, довербата и заедничката визија за развој, градоначалникот на Општина Крива Паланка, Сашко Митовски, оствари работна и пријателска средба со амбасадорот на Босна и Херцеговина во нашата држава, Н.Е. Драган Јаќимовиќ.
Средбата, која се одржа во кабинетот на градоначалникот, помина во исклучително конструктивна и срдечна атмосфера, при што беа разменети мислења и информации за унапредување на постојната соработка и за отворање нови можности за заеднички иницијативи од интерес на граѓаните.
Посебен акцент беше ставен на веќе воспоставената соработка со збратимениот град Сребреник од Босна и Херцеговина, која претставува пример за искрено пријателство. Соговорниците се согласија дека постојат реални можности за интензивирање на соработката, особено во областа на културата, промоцијата на нематеријалното културно наследство и традицијата, како и во развојот на туристичките потенцијали на двата града.
Градоначалникот Митовски го запозна амбасадорот Јаќимовиќ со карактеристиките и развојните политики на Општина Крива Паланка, со тековните инфраструктурни проекти, како и со визијата за општината како современа, урбана и еколошки ориентирана локална самоуправа.
Амбасадорот Јаќимовиќ го поздрави активниот ангажман и посветеноста на локалната власт, истакнувајќи ја важноста од зајакнување на врските меѓу општините и градењето партнерства кои ќе придонесат за економски, социјален и културен напредок. Тој изрази подготвеност за поддршка во воспоставување директни контакти со нови општини-партнери од Босна и Херцеговина и реализација на заеднички проекти со регионален и европски карактер.
Двајцата соговорници се согласија дека локалната соработка е клучен фактор за градење стабилност и развој во регионот, а преку размена на искуства, заеднички културни настани, иницијативи за младите и спортот, како и преку економска и туристичка соработка, ќе се создадат нови можности за напредок и благосостојба на локалните заедници.
Средбата претставува силна основа за натамошно продлабочување на пријателството меѓу двете збратимени општини и за реализација на конкретни проекти кои ќе донесат видливи и одржливи придобивки за граѓаните. Општина Крива Паланка останува посветена на градење отворени партнерства, регионална поврзаност и долгорочен развој преку соработка, доверба и заеднички вредности.
