Крива Паланка и оваа година, на 19 јануари, свечено и достоинствено ќе го одбележи големиот христијански празник Богојавление – Водици, празник што длабоко е вкоренет во духовниот и културниот идентитет на градот и неговите жители.
Во организација на Општина Крива Паланка и Македонската православна црква – Кумановско-осоговска епархија, празничната програма ќе започне со свечена Божествена литургија во соборниот храм „Свети Великомаченик Димитриј“, по што ќе следи централниот и најсвечен чин – осветувањето на водите и фрлањето на благословениот Свет Крст во водите на реката Крива Река, на традиционалната локација кај Шанин мост.
Овој чин, кој со години ја обединува заедницата и симболично го означува духовното обновување, ќе биде проследен со учество на верници, граѓани и посетители од целиот регион. За среќниот извлекувач на Светиот крст ќе следува пригоден подарок, како знак на почит кон вековната традиција.
Во продолжение на празничните активности, центарот на градот ќе биде исполнет со радост, мириси и вкусови на традицијата. На Градскиот плоштад ќе се одржи традиционалната манифестација „Пивтијада 2026“, која со години претставува препознатлив белег на богојавленските чествувања во Крива Паланка. Посетителите ќе имаат можност да уживаат во богата богојавленска трпеза, со околу 5.000 порции традиционална пивтија подготвена од локални кулинарски мајстори, како и греано вино и други топли напитоци, создавајќи пријатна и топла празнична атмосфера за сите генерации.
Празничниот ден ќе биде исполнет со културно-уметничка програма, во која ќе се претстави познатата Ленче Кукиќ со својот бенд, носејќи автентичен македонски музички дух, емоција и чувство на заедништво.
Годинава, Општина Крива Паланка со посебно внимание ја подготви програмата за одбележување на Богојавление – Водици, воведувајќи креативни содржини и создавајќи комплетна понуда за сите посетители, со цел празникот да се доживее како вистинско заедничко искуство во духот на традицијата и обичаите.
Општина Крива Паланка останува отворен и гостопримлив град за сите добронамерници, зошто токму ваквите настани се силен потсетник за значењето на заедништвото, духовните вредности и негата на традицијата.
Организацијата на настанот се реализира во соработка со Фондацијата „Со срце за Крива Паланка“, со заедничка цел празникот Богојавление – Водици да биде одбележан достоинствено, свечено и со топла атмосфера што ќе се памети.
Општина Крива Паланка ги повикува сите граѓани и гости да бидат дел од оваа заедничка празнична приказна и заедно да ја споделат радоста, верата и убавината на „Богојавление – Водици“ и манифестацијата „Пивтијада 2026“.
