Учениците од четврто одделение при ООУ „Св. Јоаким Крчовски“ денес ја посетија Општина Крива Паланка, во рамки на наставните активности кои имаат за цел да ги запознаат младите со работата на локалната самоуправа.
Придружувани од своите наставници, учениците се сретнаа со градоначалникот Сашко Митовски, кој со големо задоволство одговараше на нивните искрени и љубопитни прашања. Малите посетители се интересираа за тоа како функционира општината, со какви предизвици се соочува градоначалникот во секојдневната работа, како и што е потребно за да се стане „прв човек“ на една општина.
Градоначалникот Митовски нагласи дека ваквите средби се вистинска инспирација и потсетник дека младите се иднината на заедницата:
„Нашата главна мотивација е да создадеме подобри услови за вас, младите. Затоа ја градиме Крива Паланка како дом, најубаво место за живеење на сите генерации“ истакна Митовски.
Особено внимание и радост кај учениците предизвика моментот: поставување прашања на говорницата. Учениците имаа можност да почувствуваат одговорност, но и поттикнувајќи ги на креативност, самодоверба и тимски дух.
Посетата претставуваше драгоцено искуство за учениците, бидејќи одблизу се запознаа со начинот на кој функционира локалната власт и добија инспирација активно да учествуваат во општествените процеси.
Децата си заминаа исполнети со нови знаења, силни впечатоци и искрена радост , оставајќи зад себе општинска сала исполнета со детска енергија, насмевки и топлина.