Претседателката на Општинската изборна комисија на Крива Паланка, денес го врачи уверението на новоизбраниот градоначалник Сашко Митовски.
Митовски во своето обраќање изрази голема благодарност до граѓаните кои го поддржаа, како и до општинската администрација и досегашниот градоначалник за успесите кои ги постигнаа во изминатите четири години.
-Нема поголема чест да се служи од срце и искрено на граѓаните на Крива Паланка. Свесен за целокупниот товар и голем предизвик кој стои пред мене денес, ја барам поддршката на секој еден од вас, да се ставиме во функција и служба на граѓаните на Крива Паланка и да направиме се за нивно добро, истакна Митовски во своето обраќање пред присутните.
Досегашниот градоначалник Мицевски му го честиташе изборот на новиот градоначалник Сашко Митовски посакувајќи му успешна работа.
– Работев посветено, и како градоначалник се трудев да дадам свој максимум за доброто на граѓаните. Сметам дека направив многу за општина Крива Паланка и очекувам новиот градоначалник да го продолжи тој пат. Чест и задоволство беше да се работи со сите вас, изјави Мицевски.
Тој нагласи дека остава финансиски стабилна општина како резултат на домаќинско, одговорно и чесно работење на сите во општината.
На свеченоста на градоначалникот Митовски симболично му беше врачен и општинскиот клуч.
По добивањето на уверението, во градоначалничкиот кабинет беше направено примопредавање на печатите и пописната листа со што Сашко Митовски и официјално стапува на функцијата градоначалник на општина Крива Паланка.
