Поради зголемените потреби за одржување на бујната тревна вегетација на јавните зелени површини, Општината ангажираше три невработени лица од социјално ранливи категории како дополнување и поддршка на постојната служба за одржување на урбаното зеленило при јавното комунално претпријатие Комуналец. Ангажманот се реализира преку Програмата за социјална, здравствена и друга заштита.
Во изминатите две недели беа спроведени активности за косење на тревната вегетација на повеќе локации, меѓу кои:
-околината на спортско-рекреативниот центар,
-просторот покрај пешачката патека „Стара Вада“,
-регулационите корита на Дурачка Река,
-регулацијата кај Дол Единство,
-долниот дел од регулацијата на Домачки Дол,
-просторот покрај двата локални патишта кон манастирот Св. Јоаким Осоговски,
-делови од речното корито на Крива Река,
-како и други помали површини.
Паралелно, вработените од комуналното претпријатие ги одржуваа уредените зелени површини во урбаното подрачје и околу детските игралишта.
Со оглед на тоа што временските услови се поволни за интензивен раст и развој на тревната вегетација, на одредени локации се вршат и повеќекратни косења.
