Денес во Општина Крива Паланка, во пригодна и свечена атмосфера, беше доделена наградата за значаен придонес во областа на театарот и културата – лауреат на седумнаесетото издание на МТФ „Свети Јоаким Осоговски“ за 2025 година, на актерот Игор Џамбазов.
“Почит за една кариера, инспирација за нови генерации”
Игор Џамбазов e македонски актер, писател, музичар, поет, текстописец, беседник, режисер, но и ТВ-водител, шоумен и забавувач. Човек со кревка уметничка душа, чие име е одамна врежано во срцето на македонската театарска сцена, телевизијата и книжевноста.
Тој, повеќе од четири децении го креира и обликува македонскиот културен простор, а театарскиот посебно, и затоа наградата за лауреат на овогодинешното издание на МТФ „Свети Јоаким Осоговски“ му припадна токму нему, за неговиот неисцрпен придонес и влијание врз културниот живот во земјата и пошироко. Тој не само што го дефинираше театарот на нашите простори, туку и го инспирираше секој актер, режисер и љубител на сценската уметност, да верува во моќта на театарот како катализатор за општествени промени.
Со секој негов настап – било на сцена, на телевизиски екран или меѓу кориците на неговите книги – тој ни подарува дел од себе. Дел што инспирира, дел што предизвикува смеа, понекогаш солза, но секогаш размислување. Игор не глуми – тој живее во сè што создава. Игор е редок спој на една изградена уметничка душа и експериментаторски нагон, кој неуморно шета низ просторот и времето.
„Со особена чест, во името на фестивалот, во името на публиката и во името на сите што преку него ја засакаа уметноста –му го доделуваме признанието Лауреат на 17. Меѓународен театарски фестивал „Св. Јоаким Осоговски“, на Игор Џамбазов.
За нас е голема чест и задоволство што имаме привилегијата да му оддадеме почит и признание на Игор Џамбазов, кој со своето инспиративно творештво и посветеност, во текот на својата кариера остави неизбришливи траги во македонскиот театар у културниот живот воопшто“, – изјави пред присутните градоначалникот на општина Крива Паланка, Сашко Митовски.
Фестивалската програма, која започнува вечерва со претставата “ВИСТИНА“ на театарот „Комедија“ од Скопје и ќе продолжи до 6 октомври со богат избор на театарски претстави, кои во себе носат силна провокација за сетилата на гледачите, во визуелна и наративна смисла. Гостите и посетителите ќе имаат прилика да уживаат во најдоброто од македонскиот и меѓународниот театар, бидејќи на сцената ќе се претстават театарски трупи од Велес, Куманово, Струмица и Скопје, како и театарски групи од Република Србија и Република Бугарија.
За сите информации и детали за програмата, следете ја нашата официјална веб-страница и погледајте ги профилите на социјалните мрежи. Придружете ни се и бидете дел од театарската магија во Крива Паланка.
