Во рамки на културната манифестација „Топол културен бран 2009 година“, на отворената сцена на плоштадот „Маршал Тито“ во Крива Паланка се одржа фолклорна вечер со настап на четири културно-уметнички друштва.
Манифестацијата ја отвори градоначалникот на Општина Крива Паланка, г-дин Арсенчо Алексовски, кој во таа прилика меѓу другото истакна:
„Оваа иницијатива е еден значаен сегмент во заложбите на владата да културни вредности и дела не се случуваат само во големите центри, туку и во помалите локални заедници, каква што е нашата општина.
Тоа дава можност и на кривопаланечката јавност да биде вклучена во културните текови и најновите културно-уметнички збиднувања во нашата држава.
Овој проект, истовремено коренспондира и со нашите идеи да го возобновиме и збогатиме културното живеење на градот со нови, возбудливи и интересни содржини.
Изминатите десетина дена имавте можност да ја проследите богатата културно-уметничка програма, во рамките на за првпат организираното наше – Кривопаланечко културно лето, кое се реализираше во нашиот убав манастирски комплекс Свети Јоаким Осоговски.
На задоволство на сите нас и вас сакам да Ве информирам дека на 27 и 28-ми август, ќе се возобнови и одржи меѓународниот фолклорен фестивал ,,Свети Јоаким Осоговски“ , а во периодот од 15 до 21 септември ќе го организираме и првиот меѓународен театарски фестивал во нашата општина на кој ќе учествуваат театарски групи од Србија,Бугарија и Македонија.“
Пред љубителите на фолклорот, со изворни песни и ора настапија културно-уметничките друштва „Руен“ од Кочани, „Јанко Глигоров“ од Свети Николе, „8-ми Октомври“ и „Карпош“ од Крива Паланка.