Вчера свечено беше отворена новоизградената спортска сала „Петар Поп Арсов“ во Крива Паланка, на која присуствуваа градоначалникот на општина Крива Паланка, Арсенчо Алексовски, министерката за внатрешни работи, Гордана Јанкулоска и директорот на Агенцијата за спорт, Лазар Поповски. Градоначалникот Алексовски изрази задоволство што токму за време на неговиот мандат е изградена оваа спортска сала.
– „ Сите градоначалници досега ветуваа веќе 22 години дека ќе изградат спортска сала во Крива Паланка, но вистината е дека спортската сала е изградена токму во моментот кога јас сум градоначалник и тоа е моја гордост “, – рече градоначалникот Алексовски.
На свеченото отворање на спортската сала присуствуваа и пратеникот од собранието на Р. Македонија, Веле Ѓорѓиевски, претседателот Борче Стојчевски на ОК на ВМРО-ДПМНЕ од Крива Паланка, поранешниот пратеник, Оливер Алексовски, кандидатите за советници, раководители, директори, општинската и државната администрација како и голем број на гаѓани и сите членови на спортските клубови и тренери од општина Крива Паланка, каде сите го изразија своето задоволство за изградба на овој спортски објект.
Ова е модерна спортска сала во која најмладите ги имаат најсовремените услови за спортување и развој на сите спортови. Овој објект е изграден по најсовремените стандарди и ќе го користат и спортските клубови за свои тренинзи, рекреација, како и за разни спортски манифестации.