Се одржа празничната манифестацијата „Велигденска традиција“

На 13 април, на вториот ден Велигден, во дворот на локалната установа „Градски музеј“ се одржа празничната манифестација „Велигденска традиција“.

– На Велигден се празнуваат животот и најрадосната вест за воскресението Христово. Нашата вера се темели на радоста која Исус ја донесе со светлината, а таа е наш патоказ низ животот. Затоа, не постои поубав повод на овие денови посветени на радоста, истата да ја прославуваме покрај во домовите и храмовите, и овде, заедно, со надеж дека традицијата на богоугодното прославување ќе се пренесе на идните генерации, рече на отворањето градоначалникот на Крива Паланка, Арсенчо Алексовски.

Директорот на ЛУ Градски музеј, Драган Величковски, истакна дека за Велигден нашиот народ спроведува низа обичаи кои секогаш се неодминлив дел од празнувањето на големиот христијански празник, а токму со оваа манифестација се прави симбиоза на генерациите и се негуваат велигденските обичаи и традиции.

Манифестацијата имаше и натпреварувачки дел каде се одбираше најубаво украсено велигденско јајце, најубава рачно изработена велигденска декорација, а се одржа и натпревар за најцврсто јајце. Најуспешните тројца во трите категории освоија парични награди.

Присутните кривопаланчани имаа можност да ги вкусат слатките и солени специјалитети од поставената традиционална велигденска трпеза, изработени од вештите раце на кривопаланечките домаќинки.

Претходно, како дел од манифестацијата „Велигденска традиција“ беше одржана и дводневна работилница, насловена како „Се запознаваме со обичаите за празникот Велигден“, на која учествуваа ученици од прво до петто одделение од основните училишта од Крива Паланка.