Денес во посета на Крива Паланка беше министерот за надворешни работи Никола Димитров. Во кратката официјална посета беше разговарано за перспективите и предизвиците со кои се соочува општината како и за актуелизирање на прашањето со граничните премини кон Босилеград и Трговиште.
-Главните маки кои ги има градот по разговорот со градоначалникот можам да видам дека се инфраструктурата и повеќе работни места со пораздвижена економија, а тоа е тесно врзано со она дали Македонија ќе ја отвори вратата да оди напред или ќе се врати назад во изолација, изјави министерот Димитров.
Според него, поминаа 27 години и една цела генерација остана во заложништво, а младите за жал, како што рече, ја бараат европската иднина со туѓ пасош и одат надвор.
Тој посочи дека Крива Паланка е своевиден пионер во градење пријателства со соседите, бидејќи реализирала голем број европски проекти во рамки на прекуграничната соработка, користејќи ги ЕУ фондовите, а подоцна, односно дури минатата година Република Македонија го склучи Договорот со Бугарија.
