Општинската организација на Црвен крст, по повод осум години од формирањето на Клубот на пензионери „Достоинствен живот’’, денес во просториите на ЛУ Градски музеј организираше изложба на фотографии и уникатни изработки.
На изложбата беа презентирани многу кративни рачни и уникатни изработки од членките на Клубот, за кои градоначалникот Мицевски рече дека се добива впечаток дека изработките ги правеле луѓе со ведар и млад дух, кои имаат вткаено многу љубов, емоции и позитивна енергија.
Градоначалникот Борјанчо Мицевски, заблагодарувајќи се на поканата, на членките на Клубот на пензионери им го честиташе осмиот роденден, посакувајќи им уште многу години успешна и креативна работа со желби да дочекаат и осумдесети роденден. Тој во своето обраќање до пензионерките и волонтерите на Црвениот крст, предложи иницијатива за формирање заедничка работилница со помладите генерации, со внучињата заради учење на вештините и умешноста на нашите баби и мајки, во изработката на вакви уникатни ракотворби, кои се значајно обележје и карактеристика на нашиот регион.
-Поканете ги пензионерите од соседните општини од регионот со кој природно сме поврзани, од Р.Србија и Р.Бугарија и покренете заеднички иницијативи за понатамошни ваши дружења и идни вакви креативни активности, а сето тоа ќе остане како траен белег на времето во кое живееме и твориме. Општината секогаш ќе ги препознае, поддржува и ќе помага во унапредување и проширување на ваквите активности, порача на крајот, градоначалникот Борјанчо Мицевски.
