Бадникова прослава на плоштадот во Крива Паланка

На централниот градски плоштад во Крива Паланка се одржа традиционалната Бадникова прослава во организација на локалната самоуправа на општината. Со беседа од свештенослужителите од Кривопаланечкото архиерејско намесништво, посна Бадникова трпеза и лепче со паричка од минатогодишниот кум, Бранко Величковски и топла ракија и чај беше одбележан Бадник.

Отец Дејан Апостоловски низ беседа посочи дека љубовта е најголемиот крст кој може да се носи и кој секогаш е тешко да се износи до крај, заради тоа што подразбира откажување од себеси во слава Божја и за спасение на ближниот. Токму заради нас и наше спасение, рече, Бог не го поштеди својот бозљубен син кој беше распнат на крст заради наше искупување од власта на смртта и гревот.

-Затоа, оти радост ни се нуди и ни е пружена рака на спасение, се што дише нека се зарадува и нека извикне со радосни солзи: Христе, кој за нас снисходиш и за нас пострада, слава ти.

Христос се роди!, рече Апостоловски.

На настанот присуствуваше министерот зз земјоделство, шумарство и водостопанство, Љупчо Николовски, кој ќе биде кум на Бадник следната година, градоначалникот на Крива Паланка, Борјанчо Мицевски, и неколку стотици граѓани од општината.

-Вчера бев на вечерна богослужба во Бигорскиот манастир, а денес, како што е ред, дома-овде, со Вас. Утре, пак, во манастирот Св.Јоаким Осоговски. Благодарам за можноста да бидам кум наредната,2019, година. Бог слезе на Земјата за да им служи на луѓето. Верувам дека годинава и секогаш сите ние ќе работиме и служиме во име на доброто на народот, порача Николовски.

Во обраќањето пред сограѓаните Мицевски им посака многу здравје и среќа, но секако и слога, разбирање и љубов.

-Ако постои љубов, ќе има хармонија и разбирање, ако постои почит, тоа е голема човекова доблест, а ако постои простување-нема да има никакви недоразбирања меѓу човечкиот род. Во таа насока, ги честитам празниците, посакувам домови исполнети со љубов, почит и хармонија, рече Мицевски.